Námskeiðslýsing:

Fjarskipti mynda eina af grunnstoðum nútíma þjóðfélags og eru nýtt á sífellt fleiri sviðum. Fjarskiptatæknin hefur þróast mjög hratt á undanförnum árum og er þróuninni hvergi nærri lokið, hvorki er varðar tæknina sjálfa né nýtingu hennar. Því er ljóst að þekking á fjarskiptaverkfræði verður eftirsótt um langa framtíð.

Þetta námskeið veitir grunnþekkingu á fjarskiptaverkfræði með áherslu á kerfissýn. Byrjað verður á að fjalla lauslega um sögu fjarskiptanna. Fjallað verður um helstu leiðir til að meðhöndla merki fyrir og eftir sendingu yfir rás, bæði fyrir hliðrænar og stafrænar sendingar. Fjarskiptamiðlar verða kynntir, þráðlaus og þráðbundin fjarskipti, styrk- og hornmótun, fléttun og margnýting fjarskiptarása, kynning á slembibreytum og –ferlum, suð í fjarskiptakerfum og hvernig velja þarf merkisstyrk, stafrænar mótunaraðferðir, augarit og lögmál  Shannons um rásarrýmd. Að lokum verður fjallað um kóðun gagna og hvernig skynja má villur og jafnvel leiðrétta þær.

Kennsla mun að mestu fara fram á fyrirlestra- og umræðuformi og verkefni unnin í tímum. Ætlast er til að nemendur skili heimadæmum. Farið verður í heimsókn til símafyrirtækis.

 

Hæfniviðmið:

Eftir þetta námskeið skulu nemendur m.a. geta:

  • Hannað og reiknað eiginleika kerfa sem nota styrk- eða hornmótun
  • Lýst stafrænum mótunaraðferðum og grunnhugmyndum móttöku
  • Útskýrt og reiknað áhrif suðs á mismunandi mótunaraðferðir
  • Lýst og útskýrt hvaða takmarkanir eru á hönnun fjarskiptakerfa
  • Útskýrt eðli og einkenni mismundandi fjarskiptamiðla og tíðnisviða
  • Tekist á við lausn úrlausnarefna á sviði fjarskipta sem upp koma í rekstri fyrirtækja
  • Tekist á hendur ítarlegra nám í fjarskiptum